Continue

ISAACUS GRUTERUS

In lusus amatorio
Belgico rhytmo conscripto
Auctore
JOANNE IUNIANO BRUNAEO

Insidias arcus, fallacisque arma Pharetrae
    Audaci Paphius ventilat arte puer;
Qui gemino vibrans tinctas in fonte sagittas
    Obvia fatali cuspide corda quatit.
Alludit festiva Venus, caestuque tenaces
    Imbelli nexus ingeniosa parat.
Inde Cupidinei repit vis certa furoris,
    Vivaque anhelanti pectore flamma latet;
Laetaque dum rabies victos exercet amantes,
    Exagitat sollers ora diserta labor.
Daedala sic molles, efformat Graecia lusus,
    Et Gnidio pennas, telaque digna Deo.
Hic levis aequoreas animat pellacia spumas,
    Et Venerem faeto protulit unda salô.
Hic armata fremit, ferrique horrore coruscans
    Mutato tetricas induit ore minas.
Pluraque scribentes exercent somnia vates,
    Ludibrii miris somnia ducta modis.
Dissimiles longè pingit BRUNAEUS amores,
    Nec solo servet carmine charta loquax.
Quippe enata suis verbosa licentia rebus,
    Naturae stimulos exacuisse solet.
Quique per officium Dominae spirantis anhelat,
    Fortius impellit flammea plectra calor.
Talis in Idalios noster demergitur aestus,
    Demeritus Cypriae regna beata Deae.
Quicquid in eximiis commendat rara puellis
    Gloria, & in roseo corpore pingit ebur,
Nutrimenta suo vates hic colligit igni;
    Dulce, sed a vivo carmen amore sapit,
Inque suos abeunt liberrima basia morsus,
    Impressasque tenent livida colla notas;
Mollia quae furtim molitur coepta Cupido,
    Materiesque suis lusibus apta venit.
Pagina blandidulos ardens describit amantes,
    Assuetâque styli regnat in arte labor.
Laetitiae gestus, & quassae nubila mentis
    Frons dominae fluxô versa favore movet.
Singula ne longo repetens circumvehar orbe,
    In teneros nisus area lata patet.
Graiaque Romuleis miscens inventa magistris
    Festivum vates texere pergit opus.
Pone supercili nubem, rugasque remitte,
    Quisquid ad haec rigidus Carmina lector ades.
Si tibi plena calet genio ridente juventus,
    Sic decet ingratos exhilarasse dies.
Horret ab austeris aetas incongrua curis?
    Cautio exemplo lurida tolle pari.

In: Jan de Brune: Veirzjes. Amsterdam, J. Broersz, 1639, fol A6r/v. KB Den Haag 29 C 34.