Continue

[CH1636:001]
IN MONUMENTUM REIPUBLICAE VENETAE
QUOD DE ALEXANDRO III. PONTIFICE
ADVERSUS FREDERICUM I. ET OTHONEM
FILIUM A° 1178 EXIMIE MERITA ESSET
A PIO IV. PONTIFICE ERECTUM
AB URBANO IIX. DELETUM

Caesara prostratum, Veneto sternente, Quiriti
    Fassa diu, tandem perfida Roma negat.
Perfida an haeretica est? quid erit fas credere, quid non
    Credere? vim Meritis quae dedit, ipsa rapit.
18. Mart.



[CH1636:002]
(IN IDEM)
Victo Quiriti Barbarossa calcatus,
Victore Marco, innotuit fide longâ
Tradentis aevi; nulla grandis exempli
Pondus vetustas, livor, ira concussit.
(5) Nunc ipsa veritatis umbra non fertur,
Fit vis tabellae, iniqua nunc manus, quod pes
Olim superbus Caesari facit telae,
Telae innocenti; ingratitudo delevit
Quod saeculum nequivit et dies, ulla
(10) Dies nequibit. Christiane, si nescis
Papâ docente jam scies, quid intersit
Terrena virtus Coelicae; quod exstruxit
Pietate Roma, Urbanitate destruxit.
21. Mart.




[CH1636:003]
DIALOGUS CUM BARLAEO, IN
VERBA CARMINIS
QUOD SCHURMANNAE INSCRIPSERAT

HUG. Iupiter hanc privet sexu leviore puellam?
    Hoc petis? BARL. In voto est ut graviore beet,
Anna sit Annaeus. HUG. Nimirum Annaeus et Anna,
    Hic-haec. BARL. nil tolli posco, sed assuier,
(5) Haec-Annaeus hic-Anna siet; sibi mater amorum
    Pronuba ducenti nubat Atlantiadae.
HUG. Prudenter, Barlaee, facis pro virgine vota,
    Quae, nisi se possit gignere, non sapiet.
25. Apr.




[CH1636:004]
AD AMPLISSIMOS DOCTISSIMOSQUE VIROS
G. STAACKMANNUM ET
G. BARLAEUM
[Grieks-]paraítêsis en parainései[-Grieks]

Staackmanne lux, Barlaee dux poetarum,
Par Pegaseium; vindices rei vastae,
Iustae patroni, commeatuum et ponti,
Ponti et Batavum: fundite Hippocreneios
(5) Largi liquores inter orbe divisos
Nostro Britannos, inter invidum terrae
Gibbum atque Terram: pellimur mari prisco,
Novo natandum est; summovemur Arctois
Partim procellis; fundite in quibus toti
(10) Dominemur undas: vester hic, viri, vester,
De fonte quem Britanniae tridens nondum
Praesepsit ulli, fluctus exuli ponto
Succurrat orbi; navigabitur passis
Utriusque velis, innatabitur musto,
(15) Permessidis musto innatabitur, lacti,
Qualis dearum est. Fundite uberes venae
Quâ sit solo, coelo, saloque mercede
Carere lucri. me volente quocumque
Pulsi salo legamur ad sales vestros.
(20) His ecce piscor; libero mari liber,
Latio Batavus, hoc silentio, mecum,
Hoc melle pascor. quidquid, o boni, quidquid
Ultra rogatis, abnuo: Diis Terrae,
Diis aequorum, et, si Diis placet, Diis aurae,
(25) Pugnare vestrum est: vester, o cataphracti,
Instare Seldenis labor: mihi vocem,
Mentem, manumque derepente vix lecti
Furor libelli perculit: Stupescenti
Haec sola veri fervor extudit verba,
(30) Hos ira questus; Hocce purpuram et saevos
Potuisse fasces; hucce torva nugarum
Mandata servum compulisse Seldenum!
Pro gentium fas, pro tuam fidem Groti!
Pro. Vis volenti plura defuit linguae,
(35) Stetit palato fixa, dentium septo
Vallata coecum murmur in salivoso
Convoluit alveo; nempe ceu Mari clauso.
Staackmanne lux, Barlaee dux Poetarum
Parnassium par, copula unicae nexu
(40) Virtutis unico, insolubili nexu,
O salsi utrimque vindices rei salsae,
Qui clausit Inferioribus fretum Belgis,
Miramini os si clausit infimo Belgae ?
10. May.




[CH1636:005]
(IN POLLAM)
Pollam puellam, et bellam amavi; anum linquo:
[Quid increpas, puella bella, quae neutrum es?]
Cessante causâ nempe cessat affectus.
(20 Mei).




[CH1636:006]
MILITE GALLO DISCESSUM
EX HOLLANDIA PROTRAHENTE MDCXXXVI

Fausta soluturo spirarunt flamina Gallo;
    Solventi Zephyris invia facta via est:
Ergo dolent Batavi, stupet et subridet Iberus,
    Quod Gallo levior ventus et aura sient.
1. Iun.




[CH1636:007]
Quam toti vellet non totum solvere Classi,
    Tam totam vellet solvere Carneades.
2. Iun.




[CH1636:008]
VIRG. 6. AENEID.
Doe nam Aeneas ’twoord, (want naer Marcellus treden
    Sagh hij een Iong man treden
In dappere gedaent, in Wapenen voll schijn,
Maer diens gebuckt gesicht onlustigh scheen te zijn)
(5) En vraeghde, wie is hij, die dichtste by den man gaet?
    Sijn soon, of die hem an gaet,
Als tack des hoogen stams? wat isser woels om heen!
Wat deftiger gelaet, ’ten waer het wat verdween
In ’tswarte van den nacht die ’ck om sijn hooft sie spreijen!
    (10) Anchises quam aen ’t schreijen,
En sprack in ’tschreijen; Soon, o soon, en vraeght mij niet
Naer uwer Maghen all te machtigen verdriet:
Dat hoofd en sal het Lot de wereld maer eens thoonen,
    Niet by haer laten woonen.
(15) O Goden, gaeft ghij ons die ghift voor eighen goed,
Ghij duchte ’twaer te veel verhefs voor ’t Roomsche bloed.
Wat sal de groote Stad in ’t Marssen-veld sien stenen,
    Wat sal sij mans sien weenen,
Of, Vader Tiberin, wat sult ghij lijcken sien
(20) Daer ghij voorbij den steen van ’tversche Graf sult vlien!
Noijt Troijsche jongen sal ’thert der Latijnsche grijsen
    Soo hoogh in hoôp doen rijsen;
Noijt salmen soo veel roems in all het Roomsch besitt
Van eenigh voester-kind sien draghen als van dit.
(25) O hemel-vrughticheid, ô Trouw van ouden tijden,
    O emmermeer in ’tstrijden
Onwinbaer’ overhand! Hij waer’ hem noyt ontgaen
Wie sijne Wapens dorst gewapent tegenstaen,
’Tzij dat hij staende voets sijn’ vyand hadd bestreden,
    (30) Of, op hem ingereden,
Een schuijmend Peerd gespoort. O ongeluckigh kind,
Is ’t dat ghij ’tbitter Lot eens ergens overwint,
Ghij sult Marcellus zijn. Geeft Lelijen met hoopen,
    Geeft purpre bla’en en knoopen,
(35) Soo dat ick hem bestroij, en met een gift van niet
Mijns na-neefs groote ziel ten minsten overgiet’,
En doe hem ijd’len dienst. etc.
Hagae. 9. Iun.




[CH1636:009]
IN EFFIGIEM CARD. RICHELII
Mercedem, pictor? veniam pete Gallia donet,
    Indigni pretium grande laboris erit.
Excidit, infami lapsu, mortalis imago
    Conanti divam reddere Richelii.
16. Iun.




[CH1636:010]
IN EANDEM
Stupende cardo non fatentis Europae,
Non diffitentis; sed ferentis Europae,
Et sic fatentis; Richeli, genus divûm:
Non te in tabella simplici tuo totum
(5) Vultu intuemur, Trismegiste: personam
In qua triumphas triplicem, unicâ fronte
Reddat necesse est, quae tuam relatura est
Subire totam nata dextra naturam,
Et Galliam, et Te reddat, et tuum Regem.
17. Iun.




[CH1636:011]
(IN BARLAEUM)
Moverat aestivas inflatior Ya procellas,
    Et poterat socio sic soror esse Mari:
Absque quod inflatae decor, in multiplice ruga
    Quâ male visa fuit ringere, risus erat.
(5) Cum saturis Mudâ monitis sex ire capellis,
    Magna trias parvae noluit esse comes.
Vossius in dubio, et quidam, vix fortius, alter
    Credere se notis non valuere Notis:
Barlaei ancipites Pirene pallida mentes
    (10) Impulit, exemplo crevit uterque pavor:
Ingemuit contempta suis Heroïbus Argo,
    Nec tuba vexati tanta rudentis erat;
Vespera, si rubuit, rubuit pudibunda Batavos,
    Pontigenas, Pontum posse timere viros.
(15) Quaeque adeo socii tulimus, quae tota feremus
    Natio, mas non mas damna poeta dedit.
De Graecis, age, de Latiis nego, credo docenti,
    Quidquid sive jubes credere, sive vetas;
Sed Batavis, ignosce, potestas, Flacce, poetis
    (20) Quidlibet audendi non satis aequa data est.
Amsteldami uno spiritu decumbens. 20. Iul.




BARLAEUS ZULICHEMI DOMINO,
[Grieks-]hydrofobían[-Grieks] EXPROBRANTI

Moverat aestivas inflatior Ya procellas,
    Et socio poterat saevior esse Mari,
Absque quod inflatae furor, in multiplice ruga,
    Qua male visa fuit ringere, terror erat.

(5) Cum saturis Muda monitis sex ire caballis,
    Parva trias magnae noluit esse comes.
Vossius in dubio, et jam nunc vix-fortior, alter
    Credere se ignotis non voluere Notis.
Barlaei ancipites Pirene provida mentes

    (10) Impulit, aequoreos tunc timuisse Deos.
Si gemuit contemta suis heroibus Argo,
    Nec tuba vexati tanta rudentis erat;
Vespera si rubuit: rubuit puduitque Batavos
    Pontigenas Ponti spernere posse minas.

(15) Quae nunquam socii tulimus, quae tota repellit
    Natio, mas ter mas damna poëta timet.
De Graecis, age, de Latiis, age, credo docenti
    Quicquid sive iubes credere, sive vetas,
Nam cunctis, ignosce, potestas, Flacce, poëtis

    (20) Tam temere audendi non satis aequa data est.




[CH1636:012]
FORTI VIRO C. BARLAEO
Crediderim timuisse viros, tremuisse Poetas
    Amstelios, salsum pectora salsa salum?
Crediderim siccus, cuius dux foemina facti
    Sobria, idem potos non potuisse viros?
(5) Scilicet. Unde tamen tam cauta libido timendi,
    Tam subito madidis vatibus orta fuit ?
Nescio; siue sciam, cupio nescire videri;
    Nil mihi cum doctis unguibus esse volo.
Hoc liceat: dulces isthinc mea Muda lagenas
    (10) Obtulit, hinc salsas Ennosigaeus aquas;
Salse rei salsae vindex, ignosce roganti,
    Truserit hic magis, an traxerit iste liquor?
22. Iul. currente rotâ inter Harlemum et Lissiam




C. HUGENIO NEPTUNI ET AMPHITRITES ALUMNO
Cum tua te veheret velis audacibus Argo,
    Cum veherent matres transtra superba duas,
Divisit sors laeva viros. pars horruit undas,
    Pars tumidas secuit nescia mortis aquas.

(5) Detinuit timidos Hoofdî tunc Suada poëtas,
    Detinuit vates Heleonora suos.
Detinuit Susanna chelyn, quae passeris artes,
    Quae cecinit doctas, Aulice scriptor, aves.
Si timui, tanto prudentia iuncta timori est.

    (10) Si timui, iussus (crede) timere fui.
Si timui, si vela fui non vestra secutus;
    Sic placui domino, sic placui dominae.
C.B.
Amstelod. VIII Cal. Sextil. (25 Juli).





[CH1636:013]
C. BARLAEO, FORTE VIRO, FORTI CONVIVAE
Larga suos vacuis affudit Muda liquores,
    Largior impletis praebuit Ya suos.
Amstelidae saturi multo inter pocula nisu
    Cum, quibus expediat mergier, ambigerent;
(5) Praeualuit cadus, et veteris vis condita Bacchi,
    Displicuit Batavis publica vena meis.
Successit, Seldene, labor contemptus; abhorret
    Libero, amat clauso Belga natare mari.
Eodem die (22 Jul.) inter Teilingam et Hagam.




C. HUGENIO CONVIVAE PROFUGO
Cum dubias anceps traheret sententia mentes;
    Et vellem, nollem Te, Zulecheme, sequi;
Me sequitur magni facilis clementia Vossî,
    Inque meas partes mox Ioachimus abit.

(5) Tres sumus excordes numero. tres torva timemus
    Flumina. tres solito tingimus ora mero.
Tres fugiunt, nec sueta Ducis vexilla fidem.
    Et sociam gaudent tres violare fidem.
Res omnes facit ista reos. peccavimus in Te,

    (10) At Satrapas, quo vos arguat, actor habet.




[CH1636:014]
AD TESSELAM, DE BARLAEO, AMANTE STRENUO
Thessala Barlaeo, non nuper visa poetae,
    Qualis amatori Iulia nostra suo,
Thessala Caninefas, seu Frisia dicier ambis,
    Almerii pharos et fax animata soli.
(5) Ibit amatorum, si vis non torua videri
    Per freta, per saeuos aemula turba lacus.
Ibit eo Zonam qui, nec se perdidit, ibit
    Amstelidum crispis compta juventa comis;
Ibitur invitâ Superûm vi; si pauet omnis
    (10) Navita, non rarus, faxo, natator erit.
Unus ut ignoscas orat, vir fortis ad arma,
    Arma virûm, calamos, arma virûm, calices.
Nempe tuo vulnus rabiosa canicula vati
    Fecit Amor; visâ saucius horret aquâ.
(15) Si bibat hanc, metuit ne, quâ tibicine clares,
    Marceat infami languida vena situ.
Denique si ventis placeat, sibi cautior inquit
    Nec Veneris fractâ puppe vacare mori.
En quid agas? si qua spretae te injuria formae
    (20) Mordet, habe tecum lumina, conde facem.
Non si tota micet, non si de littore clames
    Blanda, veni, pretium, nuda laboris ero,
Non si vere novo, non si bene potus Abydo
    Classe novâ possit solvere, Seston eat.
25  Iul.




C. HUGENIO DEORUM NEPTUNI ET AEOLI CONTEMPTORI
Non me Muyda tui nuper tenuere liquores,
    Non ea vis Bacchi, non fuit illa gulae.
Ut decuit, timui Superos, Tethynque Jovemque,
    Nec volui tantis obvius ire Diis.

(5) Hos, Vir dure, pius timui. nam piscibus aequor,
    Non homini fallax destinat unda viam.
Si tua nacta fuit speratum audacia pportum,
    Fortunâ minus est, plus pietate regi.
C.B.
Amstelod. VI Cal. Sextil. (27 Juli)





[CH1636:015]
AMANTI STRENUO G. BARLEIO
Pectoris heroi, quo non augustius olim
    Intumuit, tot corripiente Deo,
Substitit ad primas, nullo discrimine, noti
    Fluminis, ad primas vis labefacta minas:
(5) Barlaeum excussit terror sibi, fortior omni
    Vate, quod hic timuit, foemina fecit iter.
Credimus? an, quia distracto graviore procellâ
    Res cum Rhenano gurgite habenda fuit,
Spreverit Ya tuas? potuit sprevisse videri,
    (10) Sed fuit haec lautae proxima causa morae:
Dixerit, ut motas adspexerit eminus undas,
    Et nemus ingenti turbine, Muda, tuum,
Quo me cumque vocas, magni Maris arbiter, o nec
    Crimine, nec testor, carmine laese meo,
(15) Fas sit non nocuo sibi consuluisse Poetae,
    Fas sit ad incedrtam cautius ire necem;
Dum turbas irate foris, dum caerula late
    Cana procelloso spuma colore tegit,
Intus ego spumas iterumque iterumque salubres
    (20) Haurium et innumeros non numerabo scyphos:
Donec ab ingesto tumeat vesicula Divo,
    Nec superet quo se suggerat Ya locus.
Sic ubi anhelantis lateri lethale carinae
    Vulnus, et extremo forte furore dabis,
(25) Naufragus hinc prodar tabulis licet, inde fluenti
    Fune, meo certe non gravis utre ferar.
Quam bene virginibus comes it sapientia Musis,
    Quanti Naturae noscere scita refert,
Quam bene libravit, quantâ ratione, nec ipsos
    (30) Quae Dii merserunt mergere posse Deos!
28. Iul.




C. HUGENIO NAVITAE AUDACI ET INTREPIDO
Vade per iratas, mi Constantine, procellas,
    Vade per adversos, navita magne, Notos.
Haesimus in ripa. fateor. cur? damna timemus,
    Quae mediis sensit dux Palinurus aquis.

(5) Haesimus in ripa. fateor. cur? aequore mersa
    Non didicit modulis dextra natare suis.
Haesimus in ripa. fateor. cur? nolo poëtis,
    Nolo meis toties esse vocatus Hijlas.
Icarus Icario si fecit nomina ponto

    (10) Fluctus Abydeno si fuit urna proco:
Si Tiberim sese iecit Tiberinus in ipsum,
    Femina si Thracum nomina fecit aquis:
Si Sappho mulier saltus aggressa viriles
    Non formidata Leucade mersa fuit:

(15) Nil moror. hac pereant fama, quos poenitet aevi.
    Non vacat, exemplo deteriore, mori.
C. B.
Amstelod. V. Cal. Sextil. (28 Juli).





[CH1636:016]
AD LESBIAM LARVA TECTAM NE SOLE ADURATUR
Quid pice sericeâ formosam lactea frontem
    Lesbia, nube nigrâ condis utramque facem?
Redde diem coelo et mihi, personatula: iniquum est
    Ne pereas uno sole, perire duos.
29. Iul.




[CH1636:017]
(AD EANDEM)
Detrahe personam capiti, praepostera formae
    Consulis, ut ne sis, Lesbia, nigra, nigra es.
Eodem die.




[CH1636:018]
(AD EANDEM)
Si faciem ne qua penetrabile sidus adurat
    Velari crasso tegmine cauta studes;
Me miserum quae larva teget, cui frigida frontem
    Ambusto duplici, Lesbia, sole feris?
30. Iul.




[CH1636:019]
C. BARLAEO [Grieks-]hydran témnonti[-Grieks] VIRES NOVAS
Quae de virtutum serie fortissima virtus,
    Claudier heroö non satis apta pede,
Fornicibus tonat alta cavis; ubi pulpita doctor
    Igneus Herculeo, dixeris, ore quatit,
(5) Supremis habitasse labris convicta, docentem
    Pallida, si quatiant ventus et unda, fugit:
Eluit unda, efflant Zephijri quod ahenea dicas
    De bis ferrato prodere verba sinu.
Sic studijs impallescunt? hos barba tremendi
    (10) Fulminis, hos animos sub gravitate fovet?
Cessit palla togae; poterit toga cedere pallae,
    Et mea semimatres stringere vitta comas,
Quin jam laurigerae scandent subsellia matres
    Et noua doctorum foemina doctor erit,
(15) Vel facere instituant quae se docuere suosque,
    Vel, quae non perimant facta, docere viri.
Tam fera Barlaeo mater Barlaea paventi
    Scommata, non ego, ne decipiare, dedit.
Placasti, confesse, Iovem; magis ardua restat
    (20) Pugna, satisfieri nunc sibi Iuno petit.
4. Aug.




[Grieks-]Ariston mèn hydor[-Grieks]. AD SUSANNAM BARLAEAM C. HUGENII
CONJUGEM, CUM PER LATUS MARITI C. BARLAEUM, OB AQUARUM
METUM, ACRIUS IMPETIISSET

Plus audes, Barlaea, viris. plus ausa fuisti,
    Plus animi, quam nos, mascula mater, habes.
Erravit Natura parens, cum condere Te, Me
    Vellet, et in tanta culpa parente fuit.

(5) Illa tibi grandes animos studiumque virile
    Indidit et voluit viribus esse marem.
At mihi femineos animos pectusque remissum
    Dum dedit, hac fecit conditione virum.
Ista mares tibi causa dedit, natosque virosque.

    (10) Dum mea femineo syrmate tecta strepunt.
Hinc fluctus, hinc spernis aquas animosa, Notosque.
    Virque Deos contra, femina sola viro es.
Me mea dum negat esse virum formido; vocarj
    Iam barbata tibi femina promereor.





AD EANDEM. II
Succubui generosa tuo Barlaea marito,
    Et dedimus victas, clara virago, manus.
Nunc chartis ovat ille meis, victoque poëtae
    Exprobrat, et me vult succubuisse Tibi.

(5) Cedo iterum intrepidaeque volo succumbere matrj,
    Et Constantinae laudibus esse minor.
At si forte tuâ est potior mea causa; pudoris
    Hoc etiam fuerit dissimulasse mei.





III
Roma stupe. de me victrix iam nupta triumphat.
    Fortunae nunquam sors fuit illa tuae.
Captivus, victusque trahor. mihi scommata mater
    Obycit, et salso perfricat ore Scholas.

(5) Tanti undam timuisse fuit. me mergite fluctus,
    Mergite vesanos pontus et Ya metus.
Vlterius nolo proprio superesse pudori.
    Infamis tanto crimine fama mihi est.
Scilicet, ascendet doctorum pulpita mater,

    (10) Et timidas cupiet vitta docere togas.
Peccavi, Superi. sexum mutate timentis,
    Vestiat ignavos pallida palla pedes.
Aut si Barlaeum cupitis me recta docere,
    Signa gerat sexus tanta magistra mej.





IV
Orta mari Venus est. Veneris Barlaea propago est.
    Quid mirum? nullas si timet uxor aquas.
Formavit tellure senex mea membra Prometheus.
    Quid mirum? terrae si sua terra placet.

(5) Nec culpa est, timuisse: nec, has sprevisse procellas,
    Nempe suo duplex causa probata Deo est.





AD HUGENIUM
Si fatear peccasse viros, si prodita facti
    Causa, satisfactum non sibi Iuno putet.
Si vere Phrygias, at non Phrygas esse poëtas
    Eloquar, haud factum sit tibi Iuno satis.

(5) Si potui placare Iovem tot versibus, esto,
    Thure satisfactum non sibi Iuno putet.
Si regeram toties, cras altera et altera reddam,
    Crede, satisfactum non sibi Iuno putet.
Si scribam pelago matres perijsse maresque

    (10) Saepe, satisfactum non sibi Iuno putet.
Mollia Barlaeae tu suggere verba maritae,
    Mollibus hanc ipsam saepius abde iocis,
Suaviter arride: nutu testare, quid optes;
    Tange verecundos, navita magne, sinus;

(15) Basia basiolis superingere mille, vel ultra;
    Crede, satisfactum tunc sibi Iuno putet.
C. Barlaeus
Hydrarum domitor debellatorque ferarum.
Amstelod. VIII. Sextil. (Aug.)





[CH1636:020]
OHE JAM SATIS EST
Iambe claude, miste non claudo, veni,
Compone dissidentium Poetarum
Composte litem; sicca lis, vinosa lis,
Lis salsa, lis non salsa, de salo exorta est:
   
(5) Yâ fremente, turbido Mudae sinu
Spumâ tremendi gurgitis, sub-infesto
Vitam Ennosigaeo credidit Hugens, suae
Maritus et malus poeta Barlaeae,
Ac, si vocarent fata, supremae diem
(10) Adivit horae ab Hoofdio renitente,
Miratus ullum posse tam dubiâ die
Timere, nec timere poculis, mergi.
Baccho fremente, turbidâ Mudae domo
Spumâ bibendi gurgitis, subingesto
(15) Gulam Lijaeo credidit sugens, parum
Marinus, at bonus Poeta Barlaeus.
Neque, ut vocârint fata, supremis diem
Abrupit horis Hoofdio propinanti,
Miratus ulli posse tam lautâ die
(20) Vacare, nec vacare poculis, mergi.
   
Iambe claude, miste non claudo, cui
Palmam dicamus e duobus athletis?
Quin ambo censeantur in causa pari,
Si sprevit hic, ubi ille contempsit, mori,
(25) Si constat ambos navigasse
            Constanter.
9. Aug.




[CH1636:021]
SUSANNA BARLAEUS CASPARI BARLAEAE, SATISFACIENTI
Barbata doctor, succube, ignauâ pedes
Vestite pallâ, de Promethei senis
Luto loquaci massa, terra territa
Liquore noto, terra nascentis Deae
(5) Concussa cunis. euge basiantium
Non false Rhetor, qui sali salem fugis,
Quidquid mereare, mas miselle, mas Mari
Impar marique, nolo nescias tuas
Convicte laudes: Teste Mudâ praedico;
(10) Ubi res virum poposcit, et gravior scyphus
Argo natante grandior clanâ scijphus
Hydram domante, dexteram Alcidae noui,
Edico Mudâ teste, Fecisti satis:
Ubi causa vatem, causa non fortis viri
(15) Fortem patronum, teste Mudâ praedico,
Edico et Hagâ teste, Dixisti satis.
Expecto mandes an satisfactor, satis
Fictor, satis victor, satis vector, satis
Hector vocari, doctor an dictor velis.
11. Aug.




[CH1636:022]
HUIJGENS STRAET. HUGENIANA
Innumeris aliae jactent sua compita tectis,
    Quod stupeant magis hic civis et hospes habent:
Una domus, paries uni quam nectit equili,
    Absoluit, quâ non pulchrior una, viam.
16. Aug.




[CH1636:023]
DE WARANDE. VIVARIUM
Quae quadrupes multo quondam mihi fecerat antro,
    Incola sanasti vulnera multe bipes.
Plaudat quisque suae: mea non ingloria laus est,
    Hic habitare homines, hic habitasse feras.
16. Aug.




[CH1636:024]
PLUVIA POST ARDOREM SOLIS
Quaeritur insano Phoebus quam torruit aestu,
    Ut fuerit pluuio vespere lota dies?
Occurrit ratio. grandi conamine coelo
    Ridenti lachrimas exiluisse puta.
In castris prope Heusdam. 6 Sept.




[CH1636:025]
RUBOR VESPERTINUS
Qui sub nube niger piceâ quasi luxerit aether,
    Vespere praecipiti si rubet, unde rubet?
Convictus peccasse, rubet pudibundus, et ultro
    Crastino, ait, voveo, sole serenus ero.
In castris Sprangae 10. Sept.




[CH1636:026]
RUBOR MATUTINUS
Unde dies roseis aurorae tota quadrigis
    Mane rubens, madido turbine sera pluit ?
Potus enim qui mane rubet quocumque liquore,
    Non dubie toto vespere micturiet.
11. Sept.




[CH1636:027]
HIRUNDO HUMILIS
Si ruet in terram de coelo proximus imber,
    Cur nondum madidae proxima hirundo volat ?
Praesentes adeo rata quas bene praevidet undas,
    Iam natat, aut, ad humum prona, natare parat.
11. Sept.




[CH1636:028]
ANAS SE PROLUENS
Quae toties se mersat Anas, praesagula, toto
    Vertice, sic, inquit, tota madebit humus.
11. Sept.




[CH1636:029]
PAVO QUERULUS
Quid fera praesagit quae se Iunonia moeste
    Inuocat, et planctum planctibus addit avis?
Praesagit miseranda, quibus, quâ sicca superbit,
    Iam jam deciduis pluma madebit aquis.
11. Sept.




[CH1636:030]
CREPITUS OPERIS INTESTINI
Intestina crepant murorum robora, grandi
    Turbine, turbato grandine terra tremet.
Horribiles instant straturi caedua venti;
    Quis concussa metu pedere ligna neget?
Ibid. 12. Sept.




[CH1636:031]
LUCERNA CRISPA
Unde, gelu fluuijs instante, volubile seuum
    Cincinno lychnos induit Ionio?
Qui flammae damnatus erat, jam denique cristam,
    Seruandus fido frigore, tollit adeps.
Ibid. 12. Sept.




[CH1636:032]
LUNA PALLIDA
Obtinet antiquum, si, quod venator, arator,
    Navita, pastor ait, pallida Luna pluit.
Testis es, Actaeon, quantas, pallore feroci,
    Irâ siue metu, Cynthia fudit aquas.
Ibid. 13 Sept.




[CH1636:033]
STELLAE SCINTILLANTES
Quae graue scintillans portendit ab aethere frigus,
    Iam descensuro frigore stella tremit.
Ib. 14. Sept.




[CH1636:034]
IN EASDEM AMANTIS
Si scintillantes portendunt frigora Stellae,
    Illa nimis dubiae sortis imago meae est.
Cum risu micat insolito, si frigore amantem
    Non ferit, aut ferijt Polla, ferire parat.
Ibid. 14. Sept.




[CH1636:035]
(IN AULUM)
Aulus dierum plenus, adjici nihil
Desiderat caussâ suâ, sed filij:
Huic senex prodesse, non sibi, cupit.
Quod vivit Aulus, liberaliter facit.
23. Sept. Sprangae in castris. extemporaneum.




[CH1636:036]
ARANEA PRODIENS
Sudabit paries, et erunt mox flumina rimae:
    Submergi metuens prodit araneola.
Ib. 24. Sept.




[CH1636:037]
LUNA RUBICUNDA
Luna rubet. quid tum? cras a tibicine disces
    Quam res sit vero congrua, flare rubram.
Ib. 24 Sept.




[CH1636:038]
LUNA ALBA
Pallida luna pluit, rubicunda flat; alba quid? omnes
    Dixisti; superest, alba serena siet.
Ib. 24. Sept.




[CH1636:039]
NEBULA ASCENDENS
Sol sitit, et nimias (premit ipsos crapula divos)
    Iam jam cogetur reddere potus aquas.
Ib. 24. Sept.




[CH1636:040]
PLUVIA ET TEMPESTAS POST TONITRUA
Nescitur coeli cur diluat unda fragorem?
    Ambigitur cur hanc flamina discutiant?
Iuno Iovem saturum tonitru gravis increpat: ille
    Mingit, et his, inquit, flamma residat aquis.
(5) Quid soror et Conjux? rabido suspiria nisu
    Efflat. hic est quo tu turbine, nauta, peris.
Ib. 27. Sept.




[CH1636:041]
NEBULA DESCENDENS
Provocat audaci superos certamine Titan,
    Quantas de terra tollere possit aquas.
Excidit ingens urna deo: ridetur ab omni
    Coelite: non niteat laetior illa dies?
Ib. 29. Sept.




[CH1636:042]
IGNES FATUI
Quid fatuos ignes memorabo? spectra? vapores?
    Nescio. si taceat Iulia, dicat amans.
Ib. 29. Sept.




[CH1636:043]
NIX
Quae sit origo Nivis, si non bene creditur ardens
    Diva reo barbam vellere Iuno Ioui?
Mollius hoc. tonsore deum properantius uti,
    Furtivis avidum basia ferre toris.
Ib. 1. Octob.




[CH1636:044]
GRANDO
Compactâ divis manibus niue ludere potos
    In Coelis, acri frigore, dico deos:
Illa per aetherios praeceps, ubi soluitur, ignes,
    Gutta fit. hinc nostro frigore Grando coit.
Ib. 3. Octob.




[CH1636:045]
GLACIES ET EIUSDEM SOLUTIO
Frigore durari fluuios concedo Stagirae:
    Qui coeant, sanus nemo sat explicuit.
Explico: dum fugiunt tremulae, sine veste, misellae,
    Exiles, atomae frigora particulae,
(5) Concurrunt, veluti se, tempestate coortâ,
    Muta, pecus mutum, mutua turba tegit.
Compressae faciunt quantum testudine factâ
    Tu, Romane. ferunt quadrupedem, arma, viros.
Mox ubi anhelantes nimio sudore liquescunt,
    (10) Soluitur acris hijems, effluit unda vitro.
Discite nunc scioli caussam, cur proximus haeres
    Debeat extremi frigoris esse calor.
Ibid. 6. Oct.




[CH1636:046]
SOL, STELLAE, LUNA
Vana facem Coeli finxerunt saecula Solem,
    Vana quot astrorum lumina, tot faculas.
Usque adeo divorum epulas agnoscimus omnes,
    Nemo nec Ambrosiam judicat igne coqui?
(5) Sol focus est Iouis, est ingentis nempe culinae;
    Caetera Stellarum turba, Deûm foculi.
Luna minus dubie superarum peluis aquarum;
    Hoc coenaturus Iuppiter aere lauat.
Ib. 7. Oct.




[CH1636:047]
IRIS
Cum tot sustineas ac tanta negotia, Coeli
    Nuncia, curvatam pondere non stupeo.
Quod vario vultu es, miror minus; omnia Divis
    Ut referas, omni fronte parata venis.
(5) Hinc suffusa pudore rubes, hinc candida risu,
    Alba metu, flauâ concita bile micas.
Hinc viridi spem fronte refers, hinc caerula tollis,
    Vxor Aristarchi veste, colore, statu.
Qualemcumque voles da, Quintiliane, colorem,
    (10) Una datis vna concolor Iris erit.
Ib. 9. Oct.




[CH1636:048]
(AD BARLAEUM)
Dogmata scrutanti male vestigata Stagirae:
    Non Samio, nec per somnia, visa seni,
Digna focis et avis et libertate Batauâ,
    Sin mavis, Batauâ simplicitate, loquor.
(5) Quis mea, quis veterum, quis tu, Romane, quis Hellen
    Ingenij subdas libera colla jugo?
Excidit, haec leviter tentanti, mascula casu
    Dictio et audaci punxit aculeolo:
Mollior, et quasi de sexu sequiore secuta est
    (10) Altera, dum vati languida vena stetit:
Hinc descenderunt similes longo ordine nati.
    Fecerunt mas et foemina progeniem.
En jocus est, Barlaee, brevis contempta freti sors,
    Et furor aestivi velificatus Yae:
(15) Haec praeit audendo pictoribus atque Poetis,
    Hanc, ignosco, licet sero sequare ratem.
Sprangae 10. Oct.




[CH1636:049]
PLUVIA
Unde ruit superis tantus de sedibus humor?
    Credite, si turpe est mejere, flere Deas.
Ib. 11. Oct.




[CH1636:050]
STELLA VOLANS
Stare loco nescit, nec in una sede moratur:
    Si non decipimur, lumina, Stella volat.
Nauta caue: cras non dubie dominabitur undis
    Qui jam descendens sidera turbo quatit.
Ib. 11. Oct.




[CH1636:051]
AD ENSEM MEUM
Humanum fugio, vel justâ caede, cruorem:
    Non illâ uictor conditione siem.
Laede lacessitus Laedentem, ut Laedere cesset;
    Si me defendis, fide, satis furiae est.
13. Oct. Sprangae.




[CH1636:052]
TERRAE MOTUS
Si pereant quae nascuntur, par pondus ubique,
    Semper, et aequali robore Terra ferat.
Sed perstant quae nascuntur, resolutaque durant
    Quae quacumque tui prodiga Vesta paris.
(5) Et bene miramur, si mole molestâ, ut iniquâ
    Mente sub ingesto pondere Asella, gemis?
Nec male miramur, si, qua praecordia tendis,
    Concutis ingentem mota superficiem?
Ib. 14. Oct.




[CH1636:053]
PARELIJ
Sol genuit Soles, vitiatâ nube Puellâ:
    Fortiter hoc: sed jam jam Pater orbus erit.
Quam similis Divo est turpissima bestia! fallar,
    Ni nimis hos foetus, Phoebe, fovendo necas.
Ib. 15. Oct.




[CH1636:054]
COMETA
Qua prodis, crinite, palam est, insaniet orbis,
    Plurimus incendet pectora nostra furor.
Si dubitat quis, es indicio, qui, vertice raso,
    Sic furis, assumpto, Galle, capillitio.
Ib. 15. Oct.




[CH1636:055]
PLANETA
Aio Stagiritam, quae tam vaga in aethere Stella est;
    Ambulat atque errat cum duce Aristotele.
Hoc ridere juuat: quasi nollet cedere Coelo,
    Septem Planetis Graecia clara fuit.
Ib. 16. Oct.




[CH1636:056]
DIES. NOX
Nocte dieque vices rerum Natura notavit:
    Moerorem tenebris, lumine laetitiam.
Quis pudor est, semper tirones discere, quae nos
    Nigra docet nox, et candida quaeque dies!
(5) Tandem nec puero, nec iniquâ mente ferendum est,
    Quod toties aequâ, nocte dieque tuli.
Ib. 17. Oct.




[CH1636:057]
ECLIPSIS SOLIS
Phoebus amat, calidusque suam nunc Daphnida, Vestam
    Ambit et insano deperit intuitu.
Diva soror, si vel casu, vel amantibus obstat
    Invida, nec limos virgo procantis amat,
(5) Liquitur ille, aiunt, animo, fert fronte dolorem,
    Aeternam nubes abdit opaca facem.
Me ratio diuersa regit: jubet, aio, Sorori,
    Ut Speculum incompto commodet: illa venit,
Adstat, et aversam terris se praebet amanti,
    (10) Divinâque Deum proxima fronte refert.
Hic obiter te, Phoebe, vides, obiterque recenses
    Quam vaga currenti miscuit aura comam.
Tandem compte redi: rogat hoc quae se nec amantem,
    Dum te non illam tu proce, Vesta videt.
Ib. 17.




[CH1636:058]
(AD BARLAEUM)
Censor severae veritatis, arbiter
Severe falsi; fabulantem fabulas
Suffer poetam, parua dicendis mora est,
Parua audiendis, veritati nec jocum,
(5) Nec verba vim factura nosti. scilicet
Sic vivitur, Barlaee, sic victum est diu,
Fuco placetur, veritas odium parit,
Aut fallere aut falli student homunculi;
Ad falsa proni, ad veritatem nauseant.
Sprang. 18. Oct.




[CH1636:059]
AD AMP. VIRUM I. MIJROPUM CAMERAE FISCALIS HOLLANDIAE
ASSESSOREM, CUM SUPERIUS EPIGRAMMA MISISSET

Quae, triplici carbone, viro sanata puella est,
    Non tribus illa locis, quattuor aegra fuit.
Pistillo, non Pastillo medicamur: abite
    Andromachi, anguillâ est vipera victa mari.
(5) Esto procul qui nos torsit crudelis amaror,
    Suavia se ingratis praeualuisse probant.
Oppugnata viro, victrix ouat aegra valetque.
    Non haec Andromachi Theriaca, Andromachae est.
His tam compositis opus ingredientibus, uno
    (10) Sponsula decidens ingrediente redit.
Tu tamen, haec, Mijrope, caue mijsteria pandas:
    Est omni gravior ulcere Pestis, Amor.
Quod si crebra nouae vulgatur fama medelae,
    Omnis in hos medicos aegra puella ruet.
Sprangae in castris. 18. Oct.




[CH1636:060]
L’ESTRAPPADE
Hos etiam fortuna rotas: tolluntur in altum,
    Praecipites lapsu quo graviore ruant.
Sprangae in castris 18. Oct.




[CH1636:061]
ECLIPSIS LUNAE
Iam furit, atque alias alio sub cardine fratrem
    Cynthia nugatur quaerere amicitias.
Postremo, si lumen, ait jam turbida, pergis
    Usque tuum Terris condere, condo meum:
(5) Et latet, et (tantaene animis coelestibus irae!)
    Ut lateat, multâ se pice foeda tegit.
Ridet ad haec radio frater, rabidaeque liquatâ
    Cum pice personam detrahit: Illa nitet;
Ut niteat (tantâne deas levitate moveri!)
    (10) Proxima ridentem rursus adire parat.
Quam bene cum terris agitur, quod, gratia quantum
    Rara, duos inter sit brevis ira Deos!
Ib. 18.




[CH1636:062]
MACULAE LUNARES
Unde, rogant pueri, maculata est Cynthia? non hoc
    Solis ab intuitu fusca puella roget.
Ib. 18.




[CH1636:063]
MACULAE SOLARES
Sunto, quibus commenta placent, maculae, astra, vapores,
    Quae medio Lyncei, non ego, Sole notant.
Si quid inest, quod adhuc nequeat cataracta vocari,
    Audiat Hippocrates, Gutta serena mihi est.
Ib. 18. Oct.




[CH1636:064]
PLUVIA POST PARASELENEN
Consulit oppositam de se sibi Delia nubem:
    Hinc illinc Divae virginis ora nitent.
Compta lauat faciem. faciem lauat umbra vicissim,
    Dumque pari nos et se lauat imbre, perit.
Ib. 18. Oct.




[CH1636:065]
VIRGAE ANTE PLUVIUM
Multo fune Dijs Titan tentoria tendit:
    Mortales moniti tecta subite, pluet.
Ib. 19. Oct.




[CH1636:066]
CORONA CIRCA LUNAM
Sola Deas inter coelestem Iuno coronam
    Induit: haec regni cum Iove signa gerit.
Quam tu; virgo deas inter, nec imago coronae est.
    Usque adeo laudem corporis umbra ferat?
(5) Quâ te cingis, aqua est: metuens Actaeona, ut olim,
    Pallida, at in coelis tuta lauabor, ais.
Ib. 20. Oct.




[CH1636:067]
LANCEA
Eujdiva, mortales, pacem praedicimus orbi:
    Usta deo Marti lancea displicuit.
Ib. 20. Oct.




[CH1636:068]
CHASMA
Terribilem coelo foveam suspecto sereno.
    Quis quid, ubi, quantum dixeris esse rei?
Nescio, nec pudor est: coelesti lumine cernit
    Quae superant coeli sidera sola Fides.
Ib. 20. Oct.




[CH1636:069]
LIS VENATORIA
Fugit et euasit lepus inter crura puellae;
    Illa feram stricte clausit utroque genu.
Controvertenti, praedam mihi vindico, dixit,
    Priscâ Dianae lege: Pilosa pilo.
Panderen in castris. 20. Oct.




[CH1636:070]
(APOPHTHEGMA MORIONIS)
Morio stultorum simulavit spargere sulco
Semina. quaerenti, quid ni sereret sapientum?
Non isthaec, non omnis, ait, fert omnia tellus.
Pander. 20. Oct.




[CH1636:071]
LAPIS FULMINARIS
Dira Iouis jussu cudenti fulmina Fabro
    Excidit incauto malleus, an cuneus?
Neuter. ab intacta tentavit rupe favillam,
    Primus ab infracta desilit iste lapis.
Ib. 21. Oct.




[CH1636:072]
PRUINA
Terra tepens, ne putrescat, cum carne saliri
    Postulat; hac hijemem prata bovesque ferunt.
Sal faciunt Sol atque Salum, facit Ignis et Aether,
    Ipsa vaporando terra salina sibi est.
Ib. 21. Oct.




[CH1636:073]
ROS
Accipe posteritas, quod se scivisse nepotes
    Gaudebunt, se non scisse puderet auos.
Sidera sudarunt nocturno lassa rotatu,
    Dum procul est Phoebi qui voret ignis aquas.
(5) Inde graues udo ceciderunt aethere stillae,
    Inde frequens omni gramine gutta sedet.
Ib. 22. Oct.




[CH1636:074]
DRACO VOLANS
Hic est, Astrologi, caput, hic est cauda draconis:
    Vestra nec ignoro somnia, nec patior.
Longa decussari vobis, non lata, videtur
    Linea? Iam non est linea, jam nihil est.
Ib. 22. Oct.




[CH1636:075]
VENTUS
Est vento levior quae de spiramine venti
    Hactenus in vulgum didita causa viget.
Discite doctores: quibus hic agitamur, anheli
    Naribus expirant flamina Solis equi.
Ib. 22. Oct.




[CH1636:076]
SIDUS HELENAE. CASTOR CUM POLLUCE
Inclamata diu Tethijs dormitat, et uno
    Spernit adhuc miserûm lumine coeca preces.
Evades Palinure, ambos patefecit ocellos;
    Iam vigil effraeni vincla datura mari est.
Ib. 22. Oct.




[CH1636:077]
IGNIS LAMBENS
Si de nocte cui, fato crescentis Iuli,
    Visa fuit summas lambere flamma comas.
Est qui de nobis exit collectior ignis,
    Obuius insurgens frigori, ut interimat.
Ib. 22. Oct.




[CH1636:078]
(NIX)
Lana fovet pecudes, algens Niue Terra fovetur.
    Credite, si tepida est Lana, calere nivem.
Ib. 23. Oct.




[CH1636:079]
Iamque opus exegi quod vel levis ira Stagirae
Vel poterit verum et nouitas abolere trimestris.
Cum volet ille Deus qui animi, qui corporis hujus
Iura tenet, certi spatium mihi finiet aevi.
(5) Parte equidem non hac meliore per ima perennis
Astra ferar; nomenque erit ut vaga nubila nostrum.
Quâ patet indomitis Hollanda potentia terris
Nullius ore legar, quin haec per saecula fame,
Si quid habent falsi, lectorum scripta peribunt.
Sprangae in castris. 23. Oct.




[CH1636:080]
AD REGEM MAGNAE BRITANNIAE
Intempestivas non hostibus, hostibus olim
    Promeritas, infers, Carole Britto, manus:
Magne Deûm in terris, quorsum, si pellere possis,
    Nolle solo Austriacos, velle salo Auriacos.
Sprang. 29. Oct.




[CH1636:081]
CORBIA (UT RUMOR ERAT) RECUPERATA
Corbia debilibus, facili conamine, muris
    Capta, novo valli robore cincta redit.
Ride posteritas: Infans prudentia nusquam
    Tam fuit in plagas ingeniosa suas.
(5) Perdit opes, operam, tempus, socios, et honorem,
    Ut, quod erat, Galli tutius esset, Iber.
30. Oct. Sprangae.




[CH1636:082]
AUSTRIACORUM E GALLIA RECEPTUS
Dum, Gallo cristis Aquilam terrente, superbam
    Victrici obruerent Lilia fronde Rosam:
Inter discipulos bellandi incredulus omnes
    Fertur in hunc Thomas increpuisse modum:
(5) Ite domum fatui. quid enim nugamur; Atlantem
    Infantem et Pumilum sternere credibile est?
Sprangae. 30. Octob.




[CH1636:083]
PRO QUATUOR SPHAERIS FERREIS,
IN TUBOS FUMARIOS AEDIUM MEARUM IMPOSITIS

Fumus homo, impleri fumo male, disputat, Orbem:
    At me sollicitum crassior error habet.
Omnia si quadrent, non debuit ille vapore
    Impleri; totus debuit esse vapor.
Sprang. ult. (31) Oct.




[CH1636:084]
(PRO IISDEM)
Mille tot ornari reprobant mea culmina Mundis,
Mille probant. Vbi conueniet sententia, fiet
Iustitia, et Mundi, me destructore, peribunt.




[CH1636:085]
(PRO IISDEM)
Aurea prima fuit, post hanc argentea, post hanc
    Aerea, post aetas ferrea quarta fuit.
Hoc Orbem doceat quadruplex et ferreus Orbis,
    Ferrea, si redeant quattuor, omnis erit.




[CH1636:086]
(IN EASDEM)
Toto summa soles habitare Ciconia Mundo:
    Vae tibi, nunc totis quattuor exul eris.




[CH1636:087]
AD ANONYMUM, BARLAEI FIDEM INIQUE TRADUCENTEM
Praue cavillator meriti nil tale Poetae,
    Qui nigro ruis in candida sensa dolo;
Mitte Fidem infidâ Fidei praetendere laruâ:
    Detorquere bonae verba, malae fidei est.
Sprangae. 1 Nou.




[CH1636:088]
Moet de Schouw de werelt dragen,
’T is de print van onse dagen,
En de reden wel bekent,
’T is de Wereld op een end.
Ib. 2 Novemb.




[CH1636:089]
(PRO IISDEM)
Si placet haec paucis, at non, si viueret, uni
    Posset Alexandro non placuisse domus.
Ille tribus ter me, quatuor quater esse beatum
    Orbibus invito diceret Orbe virum.
Ib. 3. Nou.




[CH1636:090]
(PRO IISDEM)
    Qui male contempto tegier fumaria Mundo
Disseris, en carpis quae nec, inique, capis.
Non libuit Mundi, libuit faciem dare Mundi
    Immundi. poteram commodiore loco?
Ib. 4. Nou.




[CH1636:091]
MILES E SALUBRI AERE CASTRORUM AD PRAESIDIA LUE
INFECTA REMISSUS

Nulla nec aestivis adij contagia castris:
    Praedatrice domi cingor ubique lue.
Caesaris infandi rector bone, vivere saltem
    In freto, et in portu me fateare mori.
4. Nou. in navi praetoria, infra Gornichem.




[CH1636:092]
(IN MORTIS METUM)
Cur timeam mortis, quem non vitabo, dolorem ?
    Si nequeo, brevis est, si queo ferre, levis.
Hagae 9. Nou.<




[CH1636:093]
AD L. REALIUM, CUM GALILAEI NOVA SIDERA,
ET EX IJS MODUM DEFINIENDAE LONGITUDINIS
ORDD. EXHIBERET

Despiciat coecum Galilaei sidera vulgus.
    Ad populum phaleras: paucis lectoribus Ille
Gaudebit, quibus inculces, experte Reali,
    Nil Ursâ praestante vago per caerula nautae
(5) Quam pulchrum est digito monstrari, et dicier, Heic es.
12. Nou.




[CH1636:094]
DE SALMASIO, CUM, PRAEMISSIS LIBRIS,
IN HOLLANDIAM NAVIGARE DIFFERRET

Substitit Armoricis ingens Salmasius oris,
    Dum natat Arctoo sarcina docta mari.
Quanti prudentem sine se tibi mille minanti
    Commisisse refert Ennosigaee libros!
(5) Ipse liber tot librorum si vectus eâdem
    Naue sit, haec duplici pondere mersa siet.
14. Nou.




[CH1636:095]
II
Nuda stat in patrio Salmasj littore virtus:
    Nunc, age, quem dederis, Patria, disce virum.
Ad libram, Liber et liber responsa librorum
    Libera, cui liber est sarcina visa, dabit.
14. Nou.




[CH1636:096]
III
Quidquid Aristippum, decuit Salmasium; uterque,
    Quas habui, ponto, tu rege, dixit, opes.
Addidit hic, pereant. sic te fortuna lacesso;
    Si tabula sospes enato, nil perijt.
14. Nou.




[CH1636:097]
IV
Si facis ad laudem Cijnici projecta patella,
    Doctaque te solam pascere nuda manus:
Quae non Salmasj est, qui, missis omnibus, Orbem
    Quo valeat solus pascere, nudus habet.
15. Nou.




[CH1636:098]
DOMUS MEA
I
Os medium, os sublime; suâ sub Fronte patentes
    Hinc interuallo compare, et hinc Oculos;
Tempora; Nasum; Aures; Humeris et Pectore nata,
    Pectore, ut est domini, Brachia candidulo;
(5) Ossa nitore suo; tectas cute duplice Costas;
    Conjuga sub Costis viscera, ventre cauo,
Exhibet una domus, quin, si non fallitur autor,
    Ridet ad intuitus, Haga, decora tuos.
Da veniam infanti; mox ut provectior annis,
    (10) Quae tacet in cunis, pauca loquatur, Homo est.
16. Nou.




[CH1636:099]
II
Quicumque Civis, Hospes, Incola, Accola,
    Longae, Viator, aut malae satur viae es:
Adi libenter hanc domum: Iam nunc Homo,
    Humanitatem pollicetur aduenis.
18. Nou.




[CH1636:100]
D’EERSTE STEEN VANDEN DOEL IN ’S GRAVENHAGHE
GELEGHT BY PRINS WILLEM VAN ORANGE,
’S DAEGHS VOOR BIDDAGH 2.en
DECEMB. 1636

De wel geboren hand, die God sal leeren stryden,
De schutterlijcke hand, die Schutster heeten moet
Van Hollands schutterij, van Holland, eens bebloedt,
Nu bloeyende over ’tbloed van die sijn Bloem benijden,
(5) Sijn vrijheid, fiere Bloem, stelt Holland in verblyden
In ’tbotten van haer’ Ieughd: versorght een’ vasten voet
Aen Doel en Schutterij; Het strydbare gemoed
Voorseght der Wapen-school een struijckeloos bedijden.
Werckt met een’ Witten steen de hoôp van desen dagh;
(10) Bidt merghen, Hof en Haegh, dat waerheid werden magh
Wat nu waerachtigh is: ’Tsal aen de Hand niet schorten,
(Verworpen Hoeck-steen, steunt en stijft het morwe been!)
Haer doel sal ’t voorhooft zijn, en Goliath sal storten,
En David sal ’them doen, en met den eersten Steen.
3. Dec.


Continue